Bi tħejjija għall-Viżta Pastorali ta' Monsinjur Arċisqof Pawlu Cremona fil-parroċċa tagħna, ntbagħtu xi uffiċċjali tal-Kurja sabiex iħejju diversi rapporti fuq l-istat tal-parroċċa.

Dawn l-uffiċċjali studjaw mhux biss l-aspetti spiritwali, liturġiċi u pastorali iżda wkoll eżaminaw l-istat li fih kienet tinsab il-propjeta` tal-parroċċa tagħna.

Għal dan il-għan il-Kurja bagħtet Health and Safety Inspector sabiex jispezzjona l-kondizzjoni u l-istat li fih tinsab il-knisja tal-Mirakli.

Mir-rapport ta’ dan l-Inspector jirriżulta li:

·  Kemm il-kampnar kif ukoll il-qniepen kellhom bżonn ta' tiswija u manutenzjoni

·  L-istallazzjoni tal-elettriku fuq il-bejt tal-knisja hija qadima u għandha bżonn tinbidel.
 

Wara li ġie studjat ir-rapport, il-Kappillan ħass li x-xogħol fuq id-dawl kellu jibda mill-aktar fis sabiex jiġi evitat kull perikolu possibbli.

Għalhekk ġie mqabbad engineer biex jagħmel rapport dettaljat ta' x'hemm bżonn isir, u f'isem il-parrocca, jieħu ħsieb li x-xogħol tad-dawl u t-tiswijiet neċessarji jitwettqu mill-aktar fis.

 

L-engineer ikkonferma li:

·  Il-wiring fuq il-bejt spiċċa u jinsab fi stat perikoluż;

·  Dehru ħsarat fil-bini, kemm fuq il-bejt kif ukoll fil-kampnar ikkawzati minn imsiemer u grampuni msadda li qasmu l-ġebla jew ikkaġunaw xpakkar u xi konsenturi;

·  It-travi ma xiex jiddendlu l-qniepen issaddu u qed jaqsmu l-bini, prinċipalment fil-kolonni tal-kampnar;

·  L-appoġġ tal-qniepen fuq il-bini tal-kampnar għandu jissaffa u jiġġedded. Dan jitlob li l-qniepen jinqalgħu mill-post u jinstallaw ruħhom mil-gdid;

·  Il-qniepen tal-arloġġ  għandhom bżonn tindifa;

·  L-imrietel tal-qniepen tal-arloġġ jinstabu ġġamjati u huma msadda ħafna.

 

Ghalhekk l-engineer irrakomanda li:

·  L-aktar ħaġa urġenti hija li tinbidel l-istallazzjoni tal-elettriku għal dak li jirrigwarda d-dawl fuq il-bejt. Dan ifisser illi is-sistema tad-dawl ta' fuq il-bejt għandha tinbidel għal kollox;

·  Għandha tiġi studjata wkoll sistema sabiex l-fustuni preżenti jaħlu inqas elettriku;

·  Għandhom isiru travi ġodda fil-kampnar biex fuqhom jistrieħu l-qniepen;

·  L-appoġġi tat-travi ġol-kampnar għandhom isiru b'mod tali li jiġi evitat sadid ġol-ġebla bir-riskju ta' qsim fil-gebla;

·  Il-qniepen u l-imrietel tal-arloġġi għandhom jiġu restawrati.

 

-- Il-kappillan talab lill-Kurja biex dan ix-xogħol jinbeda. Il-Kurja tat l-approvazzjoni tagħha.

-- Dan huwa biss l-ewwel stadju tax-xogħlijiet previsti fil-knisja tal-Mirakli.

-- Bħal dejjem, għandna bżonn il-ġenerożita` tagħkom sabiex dan ix-xogħol ikun jista' jitlesta.

Fr. Keith Bonnici